"LIBROS SOLIDARIOS": INTERCAMBIO DE LEITE POR LIBROS

Ao longo desta semana celebramos na escola a "Semana do Libro". Fixemos uns marcapáxinas que podedes ver expostos nos paneis da entrada do colexio, e tamén elaboramos un libriño cos contos que fixemos nas vacacións. Ademais, imos levar a cabo unha actividade para colaborar coa parroquia de San Rosendo e axudar a aqueles que máis o necesitan. Para iso, o colexio pon á disposición de todos vós (nenos, nenas, pais, nais...) un montón de libros que podedes levar para a vosa casa a cambio dun litro de leite. Hoxe foi o primeiro día e xa recollemos bastantes litros.

Agardamos a vosa participación. Deixámosvos a foto dos primeiros en participar, pero non serán os únicos!!... Xa vos iremos informando.

 

VENRES DE EMOCIÓNS

Este pasado venres foi un día de moitas emocións para os nenos e nenas de 5 anos. 

Por un lado, chegou o tan agardado día da CARREIRA SOLIDARIA, celebrada para axudar a construír pozos de auga en Níxer. Todos estaban desexando correr, e estivemos preparándonos durante moito tempo. A actividade saiu perfecta e todos nos divertimos un montón.

Pero á volta da carreira agardábanos unha despedida. Era o último día de prácticas da profe Andrea e todos estabamos moi tristes. Todos lle dixemos por que a recordariamos sempre e convidámola a virnos visitar sempre que quisexe.

Dende aquí desexámosche todo o mellor, Andrea, e que sempre manteñas esa ilusión e esas enormes ganas de traballar e facelo cada día mellor. Estamos convencidos de que serás unha magnífica profe.

Entroido 2013

Este ano o vídeo da festa do Entroido fíxose de rogar. Estivemos recompilando todas as fotografías desa semana tan especial para todos e, por fin, aquí temos un resumo do ben que o pasamos e do guapos que estabamos cos nosos traxes de mar.

Esperamos que vos guste!!

"A ratiña presumida"

Aos nenos e nenas de 5 anos encántannos os contos, tanto os que nos contan as profes como os que contamos nós, ou os que inventamos todos xuntos. Estes últimos días estamos traballando o conto "A ratiña presumida", e con el traballamos exercicios de comprensión, de lectura, de escritura..., e ata nos convertemos en artistas e pintamos a ratiña con pinceis.

Temos o corredor das nosas clases decorado cos debuxos que fixemos. Aquí tedes unhas fotos dos traballos.

 

 

 

AGASALLO PARA OS NOSOS AMIGOS DE XINZO DE LIMIA

Esta semana celébrase o Día da Paz. No cole celebrarémolo con varias actividades que xa vos iremos contando.

Tamén queremos compartir este día cos nosos amigos de Xinzo de Limia, polo que lles enviamos unha carta para saber como comezaran o novo ano e fixémoslle unha pomba coas mans dos nenos e nenas de cada clase, para que recorden a nosa amizade. Aquí podedes ver como nos quedaron as pombas.

Esperamos que vos gusten!!

Modelo de disfraz

Aquí vos deixamos unhas fotos para que vos fagades unha idea de cómo debería quedar a túnica para o disfraz. E aproveitamos para lembrarvos que en canto a teñades feita a mandedes ao cole para irlle poñendo os complementos.
        Un saúdo e moitas grazas pola vosa colaboración.          Diana e Ania.

OS REIS TAMÉN NOS DEIXARON AGASALLOS NO COLE...

¡¡Esta mañá tocaba volta ao cole despois dunhas longas vacacións!! E atopámonos cunha gran sorpresa. Debemos portarnos moi ben no cole durante todo o ano porque alí, no medio da clase, os Reis tamén nos deixaron xoguetes. Os agasallos viñan acompañados dunha carta que nos escribiron as Súas Maxestades de Oriente.

Rapidamente abrimos todos os paquetes e desfrutamos xogando cos novos xoguetes toda a mañá. Así a volta ao cole foi máis levadeira.